Onsdag 5. juni blir det både synfaring og ope temamøte.
– Opplegget er for både grunneigarar, næringsdrivande og gjerne bybønder som kanskje kan stille jord til disposisjon for aktiv bruk, så her er ei stor målgruppe, seier plansjef i Bykle kommune, Signe Sollien Haugå.
Temadagen tar til med synfaring og feltkurs i beitekartleggjing på Byklestøylane med NIBIO (Norsk Institutt for bioøkonomi). Det er oppmøte klokka 16 på parkeringsplassen ved Ålmannavegen. Etterpå blir det lapskaus på Bykle hotell før sjølve temamøtet tar til.
Utmarka som ressurs
Ordførar Hans Blattmann helsar velkomen før Sigrid Bjørgum i Bykle kommune kjem med tal og fakta for Bykle kommune. NIBIO tar for seg beitekartleggjing og utmarka som ressurs, Norsk landbruksrådgjeving ved Knut Sigurd Haugå greier ut om fagleg rådgjeving, mentorordning og andre relevante punkt. Etter ein pause kjem det mellom anna innspel frå lokale bønder. I den avsluttande bolken med ordføraren og plansjefen som ordstyrarar er det drøfting om kva me gjer for å produsere meir mat og aktivisere ressursane i Bykle i åra som kjem.
I kommunestyret
Torsdag 6. juni er det dei folkevalde sin tur. Temadagen for kommunestyret tar til klokka 09, også det på Bykle hotell, og tar for seg mange av punkta ein hadde på agendaen dagen før. I tillegg er det fokus på lovverk, støtteordningar og ikkje minst landbrukspolitikken. Håvard Næss Thomassen frå Innovasjon Norge kjem for å greie ut om “støtteapparatet”, før det også her blir innspel frå lokale bønder. Signe Sollien Haugå og Sigrid Bjørgum går gjennom plan for landbruk og auka sjølvforsyning i Bykle, før samlinga blir runda av med gruppearbeid og plenumsdrøfting. Der blir vidare utvikling og satsing hovudtema.