Stenger Rv9 ved Neset i Bygland to gonger dagleg i fire veker
Måndag 27. januar blir riksveg 9 ved Neset i Bygland stengt mellom klokka 13-13.45 på grunn av sprengningsarbeid. Frå måndag 3. februar og måndag til og med torsdag i kring fire veker blir vegen stengt to gonger dagleg, i tidsroma 13-13.45 og 22.30-23.15. I periodane med stengt veg er det omkøyring på vestsida av Byglandsfjorden.
Publisert av Ole Birger Lien
Publisert 23.01.2025 09:30
Sist endra 20.02.2025 22:39
Riksveg 9 ved Neset i Bygland blir stengt to gonger dagleg i tida som kjem på grunn av sprengningsarbeid.
Statens vegvesen
– Me er i gang med å utbetre riksvegen ved Neset. Ei strekning på 1,4 km skal bli breidare og både svingar og sideterreng skal utbetrast, seier Torgeir Hodne i Statens vegvesen.
Han legg til at arbeidet er del av eit større prosjekt med utbetringar langs riksveg 9.
Omkøyring
I tidsroma med stengt veg er det altså omkøyring på vestsida av Byglandsfjorden for lette køyretøy og utrykningskøyretøy.
– Det kjem til å stå trafikkdirigentar ved rundkøyringa på Byglandsfjord og ved Storestraumen. Så må bare alle fylgje informasjon frå trafikkdirigentar og skilting, oppmodar Hodne.
Omkøyringsvegen er ikkje eigna for bruk av tunge køyretøy. Slike må vente til stengingsperiodane er over og riksvegen er open att.