Riksveg 9 i Bygland stengt til fredag 14. februar klokka 12
I snart ei veke har riksveg 9 ved Neset i Bygland vore stengt på grunn av ustabile fjellmassar i lia over vegbanen. No er det klart at riksvegen ikkje blir opna før fredag 14. februar klokka 12.
Publisert av Ole Birger Lien
Publisert 10.02.2025 08:55
Sist endra 10.02.2025 08:55
Mykje masse skal fraktast bort før riksveg 9 ved Neset i Bygland kan opne att.
Statens vegvesen
Sist veke kom det melding om at målet var opning av vegen i dag måndag 10. februar. Det går altså ikkje.
– Det skal sprengast også i dag. Så tar det tid å fjerne alt av masse. Riksveg 9 blir opna att fredag klokka 12, seier Torgeir Hodne i Statens vegvesen.
Omkøyring
Det betyr at også denne veka må ein belage seg på omkøyring i kolonne på vestsida av Byglandsfjorden. Ein må rekne med ei viss ventetid, opp til 45 minuttar.
– Det er leiebil og trafikkdirigentar i båe endar. Så oppmodar me alle om å fylgje instruksane dei får, seier Hodne.