Mange ville ha med seg utstillingsopninga på Bjugsbakk.
Maria Björkroth
Dagen tok til med kveding av Sigrid B. Berg, medan fylkesordførar Arne Thomassen stod for den høgtidelege opninga. Eivind Tanche-Larsen Knutsen baud på både fele og munnharpe, og publikum gav seg ende over av den unge men svært dyktige spelemannen.
Drakt, handtverk og musikk
Utstillinga som opna laurdag tar for seg tradisjonane i Setesdal i drakt, handtverk og musikk. Museet har teke steget inn i dagens teknologi og nyttar lyd og ljos av ein kvalitet som møter dagens krav.
– Både i film, bilete og musikk er det avgjerande at kvaliteten er høg. Det er heilt avgjerande for å sikre god formidling. I utstillingslokala høyrer ein også lyd av Setesdal, komponert av Silje Høgevold, som også har vore kurator for musikk- og lydproduksjon, seier leiar i Setesdalsmuseet, Hind Helene Harira.
I museet kan gjester få med seg ei audiovandring der alle tekstene er lesne inn på vallemål. I tillegg får ein nyinnspelt folkemusikk, gamle opptak og filmsnuttar som viser livet før og no.
– Bygdefolk har medvirka sterkt til utstillinga, og eg ynskjer spesielt å peike på Randi Gåserud Myrum, som med sin tradisjonskunnskap har vore heilt avgjerande for det gode resultatet, seier Harira.
Suppe og lefse
Etter alle innslaga og ei spennande vandring i utstillinga var det tid for nok ein tradisjon opningsdagen på Setesdalsmuseet: suppe og lefse.
– Ein svært vellukka dag, og starten på ei utstilling som slett ikkje er statisk, men som vil endre seg over tid. Alt om nokre veker blir det små justeringar, og neste år er ny etappe av Løyni klar, seier Hind Helene Harira.
Maria Björkroth
Frå utstillingsopninga. Frå venstre: Sigrid Bjørgulvsdotter Berg, Maria Björkroth, Silje Høgevold, Eivind Tanche-Larsen Knutsen, Hind Helene Harira og Arne Thomassen.