Bykle-ordføraren opna Bykle vaskeri

Bykle-ordførar Hans Blattmann stod for snorklyppinga og opna Bykle vaskeri. Snorhaldarar var kommunedirektør i Bykle, Karina Sloth og Jan Gunnar Østerhus i Setpro Evje. Ole Birger Lien

Bykle vaskeri er del av Brynje-prosjektet. Formålet med satsinga er å redusere sosial ulikskap og utanforskap. Bykle vaskeri skal i første omgang ta seg av vasken for Bykle sjukeheim, men etter kvart går det tilbod om vasking ut både til lokalt næringsliv og folk flest. Sjølve Brynje-prosjektet er treårig, og budsjettet er kring tre mill. kr.

– Litt av ein dag!

Jan Gunnar Østerhus i Setpro Evje var smørblid på opningsdagen. Han kom med gåve til kommunedirektør Karina Sloth og Bykle kommune.

– Dette er litt av ein dag, tenk me opnar vaskeri i Bykle! Når ein veit kor viktige arbeidsplassar dette er, må slikt sanneleg markerast, sa han.

– Meiningsfullt

– Det er få oppgåver som er meir meiningsfulle for ein ordførar enn det at eg kan opne Bykle vaskeri i dag. Utanforskap og sosial ulikskap er stadig større utfordringar i samfunnet, og opninga her i dag viser at den utfordringa tar me på alvor.  Me ynskjer å legge til rette, me vil ha alle med! Som Ap-mann kjenner eg sterkt på den tanken, men akkurat i denne saka har eg alle parti med meg. Så er vaskeriet eit tilbod ikkje bare til dei som skal finne seg arbeid her, men til alle dei som skal bruke vaskeriet. Det er flott, sa Bykle-ordførar Hans Blattmann då han stod for den offisielle opninga av Bykle vaskeri fredag.

Etter opninga fekk alle frammøtte ei omvisning i Bykle vaskeri, før det var å gå i gang med marsipankake og kaffi.