Agder fylkeskommune på vitjing i Bykle torsdag. Frå venstre: Karina Sloth, kommunedirektør i Bykle, Hans Blattmann, ordførar i Bykle, Merete Hjemdahl, varaordførar i Bykle, Ann Rognlid Ebeltoft, økonomisjef i Bykle, Arne Thomassen, fylkesordførar i Agder, Rune André Sørtveit, Agder fylkeskommune, Anita Henriksen, Agder fylkeskommune og Signe Sollien Haugå, plansjef i Bykle kommune.Med fylkesordførar Arne Thomassen og fylkesvaraordførar Jorunn Gleditch Lossius i spissen trefte delegasjonen både politisk og administrativt nivå i Bykle. Høveleg ei vitjing i kraftkommunen Bykle slo Arne Thomassen fast at ein av dei mest solide steinane i grunnmuren i Agder er det mange kallar verdas beste kraftproduksjon.
– Så er det vekst i Agder, men ein må arbeide vidare for folketalsauke. I Agder har me 8000 born i familiar med vedvarande låg inntekt. Det utgjer 13%. Landsgjennomsnittet er 11%, så her har me ein jobb å gjere, sa han.
God sysselsettingsgrad
Sysselsettingsgraden i Bykle er så god at det det har resultert i topplasseringar i nasjonale undersøkingar. Thomassen peika på at det også med tanke på folketal har vore ei positiv utvikling øvst i dalen.
– Det er likevel utfordringar i Agder knytta til levekår og klima, og me arbeider dagstøtt med desse sakene, sa han.
Fylkesordføraren peika også på grundige arealrekneskap og solid digital infrastruktur som plussider i Agder. Han slo eit slag for å styrke tannklinikkane, og streka under at område som desentralisert utdanning må satsast vidare på.
– Det regionale samarbeidet om riksveg 9, med fylkeskommunen som medaktør, viser kva me kan få til når me arbeider saman, sa fylkesordførar Arne Thomassen.