Heimesjukepleie er ei teneste som skal legge til rette for at flest mogleg kan bu i eigen heim. Heimesjukepleien gir hjelp og rettleiing til eldre, sjuke eller personar med funksjonsnedsetting som bur heime.    

Mål:
Alle som bur, eller mellombels oppheld seg i kommunen, og som på grunn av helsesvikt har behov for helsehjelp, kan få vedtak om heimesjukepleie.  

• Gje tenestetilbod på rett nivå ut frå individuell kartlegging av tenestemottakar sine behov.
• Førebygge, behandle og legge til rette for meistring av sjukdom, skade, liding og nedsett funksjonsevne.
• Tenestemottakar klarer seg i eigen bustad med nødvendig hjelp 
• Behov for plass på institusjon vert unngått eller utsett 
• Eksempel på tenester er sårskift for dei som har vanskar med å kome seg til legekontoret,medisinering i dosett, injeksjonar, hjelp til personleg hygiene med meir.

Kriterier:

Tenesta vert tildelt personar som bur eller oppheld seg i kommunen og som oppfyll kriterium for å få nødvendig helsehjelp. Du må heilt eller delvis ha behov for hjelp til å ta i vare eiga helse på ein fagleg forsvarleg måte 

Tenesta er behovsprøvd og tidsavgrensa 

Heimesjukepleie er ei gratis teneste. Telefonnummer til heimesjukepleie: 952 35 026

Heimehjelp er ei yting til innbyggjarar i Bykle som etter søknad og vurdering gjev tilbod om praktisk hjelp i heimen. Eksempel på tenester er reingjering, matlaging, innkjøp og klesvask. Heimehjelpsordninga skal bidra til at eldre og personar med funkjonsnedsetting som treng hjelp og opplæring skal kunne bu lengst mogleg i eigen bustad. Endring i tenesta kan førekome i samband med sjukdom og ferieavvikling.

Kriterier

• Søkar må grunna sjukdom, nedsett helse eller funksjonsnedsetting ha behov for hjelp til å ivareta nødvendig stell av eigen bustad
• Det vert vurdert om andre i husstanden kan utføre husarbeidet

Opplysning om tenesta

• Tenesta vert utført på kvardagar
• Tenesta vert utført i samsvar med vedtaket, og reingjering vert vanlegvis utført i 1-2 timar annakvar veke
• Heimehjelp vert ikkje utført på helg og høgtidsdagar
• Tenesta inkluderer hjelp etter behov til:
  - Vanleg reinhald av rom som dagleg er i bruk; støvtørk, golvvask, støvsuging og vask av bad/toalett.
  - Innvendig reinhald av kjøleskap og mikrobølgeomn
  - Skifte av sengekle
  - Sette inn, starte og tøme oppvaskmaskin
  - Vask av kle i vaskemaskin og hjelp til å henge opp

Tenesta inkluderer ikkje:

• Risting av mange eller store/tunge golvteppe
• Storreingjering
• Rydding og reingjering av rom som ikkje er dagleg i bruk
• Førebuing til besøk eller opprydding/oppvask etter gjester
• Reingjering av trappar, gangar eller andre fellesareal i burettslag
• Snømåking
• Hjelp til dyrehald
• Flytting

Kvardagsrehabilitering er rehabilitering og førebygging i brukaren sin eigen heim, der målsetjinga er auka livskvalitet og eigenmeistring. 

Kvardagsrehabilitering er intensiv og tidsbergrensa. Fokuset er trening i daglege gjeremål i eigen heim. Eit tverrfagleg team gjer ei systematisk kartlegging. I samarbeid med deg blir det utarbeida mål, som du synest er viktig å meistre i din kvardag 

Målgruppe

Du som… 

• Søkjer helse- og omsorgstenester for fyrste gong, eller søkjer om meir teneste 

• Opplever utfordringane i kvardagen etter sjukdom/skade 

• Opplever ein reduksjon i funksjonsnivå, eller har risiko for å miste funksjon 

• Er motivert til å klare deg sjølv 

• Ynskjer å vere aktiv og bu heime 

Du kan vende deg til kommunen dersom du har spørsmål eller treng hjelp til å søke om tenesta. Dersom ein anna søker på vegne av deg må det komme fram i søknaden at det er gitt fullmakt.  

Heimevaktmester kan ein søkje om og få innvilga etter ei konkret vurdering. Det vert gjeve hjelp til oppgåver som er nødvendig for at ein kan bu heime, t.d. skifte av lyspærer, batteri i brannalarm, oppsetting av handtak, snørydding med meir. 

• Hjelp til vedlikehald og enkel reperasjon av hjelpemiddel er gratis.
• Det vert ikkje gjeve hjelp til plenklypping, hagestell med meir. Ein oppmodar om at dei som har behov for slik hjelp å tinge andre til dette.

Betaling etter eigne satsar. 

Kjøkkenet leverar middag til heimebuande som har trong for det etter søknad. Levering er tysdag og fredag.

Betaling etter eigne satsar.

BPA (brukarstyrt personleg assistanse) (helsenorge.no)