Ny giv for rekruttering til Bykle kommune

Frå venstre Per Øyvind Asbjørnsen, Martine Vik og Even Fredriksen. Ole Birger Lien

Bykle kommune er ein stor arbeidsgjevar, og mellom rekrutteringsframstøyta kommunen har halde på med i fleire år er deltaking på ulike utdannings- og yrkesmesser. Så lyser sjølvsagt kommunen ut ledige stillingar - og desse utlysingane skal no freshast kraftig opp. Martine Vik og Even Fredriksen i Bykle kommune er i full gang med å lage filmsnuttar, intervju og liknande med tilsette - som skal brukast i marknadsføringa av kommunen som arbeidsgjevar. Her får dei tilsette høve til å fortelje både om sin eigen arbeidsplass men også om livet i Bykle kommune.

Dei fleste einingar aktuelle

 Skular, barnehagar - dei fleste einingane er aktuelle for satsinga, og denne veka var arbeidet i gang i Fjellgardane barnehage på Hovden.

– Me har tru på at å gjere stillingane meir synlege, fortelje litt om arbeidsmiljø og ikkje minst mogelegheiter i Bykle kommune, vil styrke rekrutteringa. Så set me pris på dei tilsette som stiller opp og hjelper oss, seier Vik og Fredriksen.