Mat frå 19 nasjonar på mangfaldsfesten i Hovden grendehus!
Mangfaldsfesten i Hovden grendehus nyleg vart ein bygdefest av dimensjonar der innflutte og bygdefolk storkoste seg saman. Det vart servert mat frå i alt 19 ulike nasjonar til svoltne festdeltakarar!
Publisert av Ole Birger Lien
Publisert 27.11.2024 09:46
Sist endra 27.11.2024 09:46
Mat frå i alt 19 nasjonar låg på fata i grendehuset.
Bykle folkeakademi
Det er 7. gong mangfaldsfesten slik me kjenner arrangementet i dag vart skipa til. Folkeakademiet, med støtte frå kultur og fritid i Bykle kommune og frivillige aktørar, tromma saman til ei heidundrande markering av mangfald og fellesskap.
– Ein må bare takke av heile hjarta for den velviljen og den positive haldninga alle har til dette arrangementet. Nok ein gong ser me det flotte mangfaldet i si finaste form, seier Randi Steinsholt i Bykle folkeakademi.
Over 200 med
Meir enn 200 menneske samla seg i grendehuset. Alt saman tok til i kinosalen med musikalske innslag, der ein fekk rytmiske smakebitar både på ukrainsk, amerikansk og norsk. Så var det vidare til matfata, og dei bugna! Folk la i seg, slo av ein prat med kjente og ukjente, og viste i praksis akkurat det arrangementet står for - mangfald. Stort betre enn dette kan det ikkje gjerast!
Det kom over 200 menneske til mangfaldsfesten.
Bykle folkeakademi