Med ekstremveret frå stormen Dave på veg mot Rogaland og Agder, viser prognosene at det kan bli så mykje som 30 m/s vind i indre Agder i morgon sundag 5. april mellom klokka 16-18.
– I den perioden er det inga tvil om at det beste er å halde seg inne, om ein no er heime eller på hytta, seier beredskapskoordinator i Bykle kommune, Vidar Johnsen.
Publisert av Ole Birger Lien
Publisert 04.04.2026 17:52
Sist endra 04.04.2026 17:52
Beredskapskoordinator i Bykle kommune, Vidar Johnsen, oppmodar alle om å halde seg inne mellom klokka 16-18 i morgon sundag 5. april, då det er prognoser som tyder på vind på over 30 m/s. Folk blir også oppmoda om å rydde bort ting som står laust i tunet, ski, hagemøblar, grillar og liknande.
Ole Birger Lien
Sjølv om vind og nedbør etter prognosene å døme skal bli endå verre nede mot kysten, er 30 sekundmeter vind uvanleg mykje.
– Difor oppmodar me no også alle til å bruke tida før uveret set inn til å rydde bort ting som står laust heime. Hagemøblar, grillar, ski og elles alt som kan bli teke av vinden og skape farlege situasjonar, seier Johnsen.
Han legg til at for dei som uansett har tenkt seg på ski i morgon, så er dei sentrumsnære løypene eit mykje tryggare alternativ enn høgfjellstraseane.
– Bykle kommune fylgjer situasjonen fortløpande, og vil kome med meir og oppdatert informasjon viss det blir aktuelt, seier han.
Lad bilar og mobiltelefonar!
Med så mykje vind som er meldt, er heller ikkje tanken om potensielle straumbrot langt unna. Det kan difor vere lurt at alle som kan ladar opp det som bør ladast opp før uveret slår til. Bilar, mobiltelefonar osb - for å vere betre rusta viss straumen skulle bli borte.
Planlegg heimturen godt!
Med ekstremver i vente er det også ei oppmoding til alle som har vitja Setesdal i påska, om å planleggje heimturen godt. Det er det tydeleg at mange har gjort - i dag laurdag har det vore ein jamn straum av bilar nedover riksveg 9 mot kysten.