Bykle kommune delte ut utviklingsstipend
To unge utøvarar har fått utviklingsstipend frå Bykle kommune på 25.000 kr. kvar.
Publisert av Ole Birger Lien
Publisert 27.05.2024 10:12
Sist endra 27.05.2024 10:12
Chiara Isabella Saudeco Barbaro (t.v.) og Malin Dale fekk utviklingsstipend frå Bykle kommune.
Helga Jacobsen
Chiara Isabella Saucedo Barbaro har fått stipend for å vidareutvikle seg som målar og med teikningar. 15-åringen har ein djup lidenskap for kunsten sin, og bruker mykje tid på dette. Chiara har trass i sin unge alder alt delteke i fleire utstillingar, mellom anna UKM. Der har ho sikra seg plass i fylkesfinalen to gonger, og i år bar det heilt til landsfinalen i Bodø. Ho har tenkt seg til Tangen vidaregåande skule i Kristiansand til hausten, og ser for seg studiar innan kunst, design eller kommunikasjon.
Hip-hop
Malin Dale får stipend for å satse vidare på hip-hop-dans. 16-åringen har vore med på UKM sidan 2018, og har kome både til fylkesfinale og landsfinale. Ho har også dansa på Rekordfestivalen på Hovden. Til hausten planlegg ho å gå på Vågsbygd vidaregåande skule med fordjupning i dans, og ho vil ta privatundervisning. Etter vidaregåande er Bårdar Danseinstitutt i Oslo målet, der ho vil utdanne seg til dansepedagog og satsar på å bli profesjonell dansar.